Naxçıvan Dövlət Universitetində Azərbaycan Respublikası İqtisadiyyat Nazirliyinin, Naxçıvan Muxtar Respublikası İqtisadiyyat Nazirliyinin və Naxçıvan Dövlət Universitetinin təşkilatçılığı ilə “Konstitusiya və Suverenlik İli”nə həsr olunmuş “İqtisadi inkişaf suverenliyin əsasıdır” mövzusunda elmi-praktik konfrans keçirilib.
Naxçıvan Dövlət Universitetinin rektoru Elbrus İsayev dövlət başçısının 2025-ci ili “Konstitusiya və Suverenlik İli” elan etməsi ilə əlaqədar Sərəncamının əhəmiyyətini vurğulayıb, Azərbaycan Respublikası Konstitusiyasının suverenliyimizin qarantı və hüquq sistemimizin əsas mənbəyi olduğunu bildirib. Qeyd edilib ki, Naxçıvan Dövlət Universitetində dövlətçiliyimizi müdafiə edən ideoloji mərkəzlərdən biri kimi “Konstitusiya və Suverenlik İli” çərçivəsində müəllim və tələbələrin iştirakı ilə bir çox müxtəlif elmi-praktik tədbirlər, respublika və beynəlxalq səviyyəli konfranslar keçirilir, araşdırmalar aparılır.
Azərbaycan Respublikası iqtisadiyyat nazirinin müavini Səməd Bəşirli çıxışında bildirib ki, ötən əsrin 90-cı illərinin əvvəllərində ağır problemlər məngənəsində olan ölkəmiz Ulu Öndər Heydər Əliyevin rəhbərliyi altında dirçəlməyə başladı, bazar iqtisadiyyatı formalaşdı. Qısa müddət ərzində Azərbaycan iqtisadiyyatında makroiqtisadi sabitlik təmin edildi, xarici iqtisadi əlaqələr inkişaf etdirildi və özəl sahibkarlığın əsası qoyuldu. Prezident İlham Əliyevin rəhbərliyi altında daha da güclənən dövlətçiliyimiz və iqtisadi qüdrətimiz 2020-ci ildə Vətən Müharibəsində tarixi Qələbəmizi təmin edən əsas amillərdən oldu. 2023-cü ildə isə bir günlük antiterror əməliyyatı ilə erməni silahlı qüvvələrinin qalıqları torpaqlarımızdan təmizlənərək Azərbaycan Respublikasının suverenliyi tam şəkildə bərpa edildi.
Bu gün ölkəmiz Prezident cənab İlham Əliyevin diqqəti və qayğısı ilə mövcud qlobal çağırışlar fonunda uğurla inkişaf edir. Xüsusilə biznes mühiti və sahibkarlıq fəaliyyətinin şaxələndirilməsi dövlət siyasətinin əsas prioritetlərindəndir. Azad rəqabət mühitinin təkmilləşməsi, resurslara bərabər çıxış imkanlarının yaradılması, dövlət dəstəyi mexanizmlərinin effektivliyinin gücləndirilməsi üçün kompleks tədbirlər görülür. Azərbaycan Respublikası regionlarının sosial-iqtisadi inkişafı istiqamətində, xüsusilə 2004-cü ildən etibarən qəbul olunmuş dövlət proqramlarının icrası nəticəsində, Naxçıvan Muxtar Respublikasında iqtisadiyyatın inkişafı, yeni iş yerlərinin və müəssisələrin yaradılması, eləcə sosial infrastrukturun yaxşılaşdırılması sahəsində böyük uğurlar əldə olunmuşdur. Bu tədbirlər regionun mövcud potensialını gücləndirməklə yanaşı, Naxçıvanın gələcək inkişafı üçün də mühüm əsaslar yaratmışdır.
Tədbirdə “Konstitusiya və Suverenlik ili”nə həsr edilmiş videoçarx nümayiş etdirilib.
Azərbaycan Respublikası İqtisadiyyat Nazirliyinin Dayanıqlı inkişaf və sosial siyasət şöbəsinin müdiri Hüseyn Hüseynov “Suveren iqtisadi siyasətdə yeni mərhələ:rəqəmsal transformasiya və dayanıqlı inkişaf”, Naxçıvan Dövlət Universitetinin Mühasibat və maliyyə kafedrasının dosenti Mehriban İmanova “Heydər Əliyev irsində maliyyə siyasəti və iqtisadi suverenlik modelləri”, Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin rəis müavini, rəis vəzifələrini müvəqqəti icra edən Müslüm Cabbarzadə “Regional inkişaf trayektoriyası: nailiyyətlər və gələcəyə baxış”, Naxçıvan Muxtar Respublikasının İqtisadiyyat Nazirliyi yanında Dövlət Vergi Xidmətinin idarə rəisi Zahid Qənbərov “Suveren Azərbaycan iqtisadiyyatında müasir vergi sisteminin transformasiyası” adlı məruzələrlə çıxış ediblər.
