Mərkəzi Gömrük Hospitalının mama-ginekoloqu Gəncə şəhərində keçirilmiş konfransda təqdimatla çıxış edib

Mərkəzi Gömrük Hospitalının Mama-ginekologiya şöbəsinin mama-ginekoloqu, t.ü.f.d., Dr.Sədi Allahverdiyev 2 mart 2024-cü il tarixində TƏBİB-in və Gəncə Birləşmiş Xəstəxanasının  təşkilatçılığı ilə Gəncə şəhərində keçirilən “Ginekologiyanın aktual problemləri” adlı konfransda “Uşaqlıq miomalarının müalicəsinə müasir yanaşma” mövzusunda təqdimatla çıxış edib. 

Gəncə Dövlət Filarmoniyasında keçirilən və 8 Mart – Beynəlxalq Qadınlar Gününə həsr edilmiş bu tədbirdə Dr.Sədi Allahverdiyev təqdimatında uşaqlıq miomasının aktuallığı, yaratdığı kliniki simptomlar barədə ətraflı məlumat verib, hazırda bu xəstəliyin yeni müalicə metodları, xəstəliyin müalicəsi üçün istifadə olunan dərman vasitələri, uşaqlıq miomasının yerləşməsindən asılı olaraq hansı cərrahi seçimin olmasının daha məqsədəuyğun olduğu barədə danışıb, eyni zamanda hospitalda icra olunan müxtəlif lokalizasiyalı uşaqlıq milmalarının video-prezentasiyalarını təqdim edib. 

Qeyd edək ki, 4 paneldən ibarət bu konfransda Bakıdan və Gəncə şəhərindən dəvət olunmuş yüksəkixtisaslı mütəxəssislər sonsuzluq, təbii doğuş, qeysəriyyə kəsiyi əməliyyatı, uşaqlıq cismi xərçəngində müasir yanaşma, qadın xəstəliklərinin müayinə və müalicəsində tətbiq olunan yeniliklər və son tədqiqatlar barədə təqdimatlarla çıxış ediblər.