Mərkəzi Gömrük Hospitalının həkim-laborantı, t.f.ü.d., Dr.Səbinə İbrahimova 8 yanvar 2024-cü il tarixindən etibarən Tibbi Laboratoriya şöbəsinin rəisi təyin olunub. Dr.Səbinə İbrahimova2020-ci ildən etibarən Mərkəzi Gömrük Hospitalında həkim-laborant kimi fəaliyyət göstərir. O, öz peşəkarlığı və səmimiyyəti ilə Mərkəzi Gömrük Hospitalının kollektivinin və pasiyentlərin böyük rəğbətini qazanıb.
Dr.Səbinə İbrahimova Mərkəzi Gömrük Hospitalının Molekulyar mikrobiologiya sahəsində Real Zaman PZR modifikasiya üsulu vasitəsilə kəmiyyət və keyfiyyət nəticələri verən diaqnostik testlərin həyata keçirilməsi, COVİD-19 diaqnostikası, hepatitlərin mürəkkəb genotiplərinin müəyyənləşdirilməsi, hamiləliyin inkişafına təsir edən zooinfeksiyalardan toksoplazma, xlamidiya, sitomeqalovirus, herpes I və II, mikoplazma və virus və bakteriya etiologiyalı bir sıra başqa infeksiyaları PZR analizin köməyi ilə təyin edilməsi ilə məşğuldur.
Dr.Səbinə İbrahimova 1997-ci ildə Bakı Dövlət Universitetinin tibbi biologiya fakültəsini bitirmişdir. 2004-2017-ci illərdə müxtəlif dövlət və özəl tibb müəssisələrində həkim-mikrobioloq kimi, 2017-2020-ci illərdə müxtəlif dövlət və özəl tibb müəssisələrində Molekulyar-biologiya laboratoriyasının müdüri kimi çalışmışdır. O, öz üzərində daim çalışan, tibb elminin son nailiyyətlərini izləyən və dünya təcrübəsindən yararlanan yüksəkixtisaslı mütəxəssisdir. O, 2016-ci ildə Azərbaycan Respublikası Səhiyyə Nazirliyinin “Səhiyyə əlaçısı” adına, 2021-ci ildə Azərbaycan Respublikası Dövlət Gömrük Tibbi Xidmət İdarəsinin Mərkəzi Hospitalının Laboratoriya şöbəsinin xidmətdə əldə etdiyi müvəffəqiyyət, qüsursuz xidmət və digər nailiyyətlərinə görə Fəxri fərmana layiq görülmüşdür.
Yeni təyinatı münasibətlə Dr.Səbinə İbrahimovanı təbrik edir, ona bu məsul işində uğurlar diləyirik!