Artıq PAŞA Sığorta şirkətinin minimum qiymətlə üstün təminatlar təklif edən Parkinq KASKO məhsulunu Insure.az sığorta portalında onlayn əldə etmək mümkündür. 

Hər zaman innovativ həllərlə çıxış edən PAŞA Sığorta şirkəti Azərbaycanın ilk onlayn sığorta portalı olan Insure.az ilə birgə əməkdaşlıq çərçivəsində müştərilərin rahatlığı və sığorta məhsullarının əlçatanlığını təmin etmək üçün yeni xidmət təqdim edir. Beləliklə, indi KASKO əldə etmək istəyən avtomobil sahibləri Insure.az portalının KASKO bölməsinə daxil olaraq cəmi bir neçə dəqiqə ərzində şəxsi və avtomobil məlumatlarını daxil edib Parkinq KASKO məhsulu üzrə müraciətlərini asanlıqla rəsmiləşdirə bilərlər. 

Bunun üçün cəmi 99 AZN sığorta haqqı ödəməklə avtomobili 1 illik müddətə 10.000 AZN təminatla sığortalamaq mümkündür. Parkinq KASKO məhsulu 5.000-150.000 AZN bazar dəyərinə malik avtomobillərə atılmış və ya düşmüş əşya, üçüncü şəxsin qanunazidd hərəkəti, oğurluq, qaçırma, soyğunçuluq, yanğın, partlayış, heyvanların hərəkəti və təbii fəlakət kimi risklər nəticəsində yaranacaq zərərlərə təminat verir.

Qeyd edək ki, ölkədə ilk dəfə 14 aparıcı sığorta şirkətinin xidmətlərini bir platformada birləşdirən Insure.az, bir il ərzində 20.000 sığorta müqaviləsi bağlamaqla 1.500.000 manat sığorta haqqı toplayan Azərbaycanın ilk mərkəzləşdirilmiş onlayn sığorta portalıdır.

"PAŞA Holding" qrupunun üzvü olan "PAŞA Sığorta" şirkəti 300.000-ə yaxın korporativ və fərdi müştərisinə 36 növ könüllü və icbari sığorta üzrə xidmət göstərməklə kapitalının, sığorta yığımlarının, sığorta ödənişlərinin həcmi və digər göstəriciləri ilə sığorta bazarının lider və ən böyük sığorta şirkətlərindəndir.