Son zamanlar nəqliyyat vasitəsi sahiblərinin beynəlxalq sığorta kartı olan “Yaşıl Kart”-la bağlı saxta sığorta müqavilələrinin satılmasına dair “İcbari Sığorta Bürosu”na xaricdə fəaliyyət göstərən “Yaşıl Kart” büroları tərəfindən  məlumatlar daxil olmuşdur. Bununla əlaqədar vətəndaşların diqqətinə çatdırırıq ki, “İcbari Sığortalar haqqında” qanunun 63.2.2-ci maddəsinə əsasən Azərbaycan Respublikasında qeydiyyatdan keçmiş avtonəqliyyat vasitəsinin sahibi Azərbaycan Yaşıl Kartını yalnız Yaşıl Kart Sistemində fəaliyyət göstərmək hüququna malik olan yerli sığortaçılarla müqavilə bağlayaraq əldə etməlidir. Bununla yanaşı vətəndaşlardan xahiş edirik ki, xarici ölkələrə səfər zamanı Yaşıl Kart sığorta təminatının alınmasında aşağıdakılara diqqət etsinlər: 

1. Yaşıl kart blankında yuxarıda solda yerləşən “İcbari Sığorta Bürosu”-nunn logosunun olmasına;

2. Yaşıl kartın qüvvədə olduğu ölkələri əks etdirən cədvəldə (8 -ci bölüm) səyahət edəcəyi ölkənin üzərindən xətt çəkilib-çəkilməməsinə;

3. Yaşıl kartı təqdim edən sığortaçı (10-cu bölüm) barədə məlumatların dəqiqliyinə

Qeyd edək ki, vətəndaşlar İcbari Sığorta Bürosunun rəsmi internet səhifəsi (www.isb.az) vasitəsi ilə və ya (012) 595 00 20 telefonuna zəng etməklə də Yaşıl Kartın etibarlılığı barədə məlumat əldə edə bilərlər.