Bakı, FinanceTime. Bu gün “Üçüncü Bahar” təşəbbüs qrupunun yaranmasından 2 il ötür. Bu münasibətlə Qrupun yaradıcıları, üzvləri və qonaqlar “Hilton Hotel”də bu günü hesabat xarakterli tədbirlə qeyd ediblər.
Tədbiri giriş sözü ilə “Üçüncü Bahar”ın yaradıcıları Nərmin Qəniyeva və Natəvan Yusifova açıb. Onlar qrupun yarandığı gündən bu günə qədər keçdikləri yol, onlara dəstək olan insanlar, üzvlərin uğurları, könüllülərin cəlb edilməsi haqqında məlumat veriblər.
Qeyd edilib ki, hazırda təşkilatın 1000 üzvü var. 2 il ərzində tədbirlərin 2000 iştirakçısı olub və 19 nəfər təqaüdçü könüllü müxtəlif layihələrdə çalışıb.
Daha sonra “Kapital Bank” ASC-nin Marketinq Departamentinin direktoru Günel Fərzəliyeva, “Kapital Bank” ASC-nin İnsan Resursları Departamentinin direktoru Fərqanə Məmmədova, “Üçüncü Bahar”ın üzvləri, Əsmər Abdullayeva və könüllü Zümrüd Qasımova çıxış ediblər.
Sonda Nərmin Qəniyeva və Natəvan Yusifova “5 il sonra “Üçüncü Baharı” harada görmək istəyirik” adlı təqdimatla çıxış ediblər.
Qeyd edək ki, “Üçüncü Bahar” təşəbbüs qrupu 19 fevral 2017-ci ildə faəliyyətə başlayıb. Qrup təqaüdə çıxmış insanlar üçün həyatın yeni səhifəsini daha rəngarən daha dinamik olması istiqamətində müxtəlif tədbirlər təşkil edir.Üzvlərin maraq dairələrinə uyğun olaraq Qrup 3 istiqamət üzrə fəaliyyət göstərir:
• Maarifləndirici
• Sağlamlıq
• Yaradıcılıq
Təşəbbüs qrupunun “YAŞA” mərkəzi fəaliyyət göstərir. Mərkəzdə təqaüdçülər üçün müxtəlif mövzulu təlim- tədris proqramları təşkil edilir. Tədbirlər təqaüdçülər üçün tam ödənişsiz əsaslarla keçirilir. Mərkəz Bakıxanov qəs. Yavər Əliyev küç. 1 ünvanında yerləşir.