23 yanvar 2024-cü il tarixində Mərkəzi Gömrük Hospitalında pediatr, neonatoloq, təcili yardım həkimləri, orta tibb işçiləri üçün Amerika Ürək Assosiasiyasının rəsmi PALS təlimi öz işinə başlayıb. Təlimin açılış hissəsində Mərkəzi Gömrük Hospitalının rəis müavini Nabil Seyidov 2 gün davam edəcək təlimin proqramı barədə çıxış edərək bildirib ki, PALS Amerika Ürək Assosiasiyasının rəsmi, dünyada tanınan təlimidir.
Dr. Nabil Seyidov bildirib: “2024-cü ildə bir neçə təlimin keçirilməsi nəzərdə tutulub. Növbəti təlim 2024-cü ilin fevral ayında olacaqdır. Təlimdə həm təcili tibbi yardım xidməti, həm Mama-ginekologiya şöbəsinin, həm Pediatriya və Neonatologiya şöbəsinin tibb heyəti iştirak edir. Nəzərə alsaq ki, Mərkəzi Gömrük Hospitalının nəzdində Ana və Uşaq Mərkəzinin yaradılması nəzərdə tutulur, yenidoğulan və uşaqların sağlamlığının təkmilləşdirilməsi üçün tibbi personalın məhz müasir beynəlxalq standartlara cavab verməsini davamlı olaraq təmin edirik. Nəzəri biliklərlə yanaşı, təlimdə Xüsusi manekenlər üzərində bacarıqların mənimsənilməsi təmin olunur və xüsusi interaktiv kompüter simulyasiya proqramı vasitəsilə komanda olaraq ağır klinik durumda olan uşaqlara təkmil tibbi yardımın göstərilməsi həyata keçirilir”.
Daha sonra Mərkəzi Gömrük Hospitalının Pediatriya şöbəsinin rəisi, uzman pediatr Telman Aytayev uşaqlara və yenidoğulanlara tibbi xidmətin keyfiyyətini təmin etmək, beynəlxalq standartlara uyğun olaraq uşaqlara göstərilən qayğını təkmilləşdirilmək, ağırlaşmaların qarşısını almaq məqsədilə PALS təlimində pediatrlarla yanaşı bütün ixtisaslardan olan həkimlərin iştirakının vacib olduğunu vurğulayıb.
Təcili Tibbi Yardım şöbəsinin rəisi, təcili tibbi yardım həkimi Fizuli Abışov çıxış edərək 2020-ci ildə yenilənmiş protokolları, pediatrik tibbi yardım sahəsində baş vermiş yenilikləri mənimsəmək, yeni bacarıqları mənimsəmək üçün PALS təliminin əhəmiyyətli olduğunu bildirib.
Təlimdə uşaqlarda müxtəlif klinik halların idarə olunması, bütün növ respirator, kardioloji və şok hallarının menecmenti, o cümlədən ürəyin ritm pozuntuları, septik halların idarə olunması müzakirə edilir. Təlimdə intubasiya, manual və avtomatlaşdırılmış defibrilyatorun istifadəsi, sümükdaxili çıxışın əldə olunması ilə bağlı praktik məşğələlər keçiriləcəkdir. Təlimin sonunda iştirakçıların nəzəri bilikləri və praktik bacarıqlarının yoxlanılması məqsədilə yazılı və praktik imtahan keçiriləcəkdir.